فساد الاسلاميين ..المتعافي نموذجا: بقلم عاطف عتمة
أنا والسلفية (1) - واقعنا المأزوم ليس سراً على أحد
السودان سيختفي: إسحاق أحمد فضل الله في زاويته المقروءة (آخر الليل)
لماذا بكى الفريق طه عثمان عند سماعه فوز ترامب؟
فك الالتباس بين التعددية الثقافية والتنوع الثقافي - بقلم علي الزين
التغيير وقيد العقل الرعوي - د. النور حمد
لا تستطيع الأنظمة الاستبدادية العيش بمفردها أبدًا إلا استنادًا على دعمٍ كافٍ تتلقاه من عدة شرائحَ مجتمعيةٍ تتماهي مصالحها مع مصالح النظام الاستبدادي
يا حمدى ابو الاقتصاد سامعنى؟؟* - شوقي بدري
نجم الغد الذي أفرح الناس ثم تركوه يبكى وحده!! - سيف الدولة حمدناالله
ﺑﻌﺪ ﺍﻥ ﺳﺄﻟﺘﻪ ﻛﻴﻒ ﺍﻟﺒﻠﺪ ﻓﻜﺎﻥ ﺍﻟﺠﻮﺍﺏ -> ﺑﻨﻘﻮ .. ﺑﺎﻋﻮﺽ .. ﺫﺑﺎﺏ
حفنة تراب في حقيبة مسافر من الخرطوم للدوحة ودموع صدق ومحبة- عثمان الصديق.
الله هو السبب في غلاء الأسعار !!! - عبد المنعم سليمان
نحو الموت والسجون - استيلا قايتانو
العبث الوجودي في رواية "اللص والكلاب" لنجيب محفوظ
قصاصات مبعثرة .. من كتاب الديمقراطية فى الميزان

رواية أجنحة بلا ريش (اداب الاسلامية) - بقلم طارق اللبيب

تقييم المستخدم: 0 / 5

تعطيل النجومتعطيل النجومتعطيل النجومتعطيل النجومتعطيل النجوم
 

رواية أجنحة بلا ريشبقلم طارق اللبيب ..

.. كيف الحال ياجماعة كيف احوالكم ..

معاكم شمس الدين احمد . 28 سنة .. اتحصلت شهادة بكلوريوس من اداب الاسلامية . وطبقتها وختيتها في دولاب امي مع فتايل الريحة . ودقشت السوق . واتزوجت واستقريت بدون شهادة . واتعوضت الله في سنيني الضيعتهن فوق الكنب ..

المهم القصة ومافيها

..

سنة 2002 تقريبا في شهر سبعة . الوكت داك انا كنت متزوج لي سبعة شهور من زوجتي الفاضلة نادية .

نحن كنا عايشين في احسن حال .. وحياتي ماشة زي السلام عليكم ..

كنت شغال في شركة بتاع مواد غذائية . وشغلي كويس شديد ..

ومؤجر نص بيت في الحاج يوسف .. شارع واحد .. واسرتي الكبيرة.

ساكنين في دار السلام المغاربة .

امي وابوي .. واخواتي سارة وسناء . واخواني .. صالح والطيب ..

انا بالرغم من اني اوسط الاولاد .. اتزوجت قبل اخوي الكبير صالح

لانو كان مغترب . ورجع من السعوديه بعد ما اتعرض لي مشاكل هناك .. ورجع بي ايديهو فاضية.

وده كمان كانت عندو قصة اغرب من الخيال .. اولا كان في السعودية اشتغل هناك 12 سنة

وكان همو يكون راس مال لي مشروع .. وفعلا كون راس مال .. فكر يستثمر قروشو في السعودية ... وطبعا في السعودية وفي دول الخليج الشغالة بي نظام الكفالة .. بصفة عامة مابتقدر تمتلك موسسة او شركة الا تكون مواظن . ولا قطعة ارض فاضية ..

المهم صالح اخوي عمل شركة ادوية بي اسم الكفيل .. لكن الكفيل كان انسان عديم الضمير .. ونكر اخوي واكل حقو .. وطبعا القانون ماعليهو الا بالاوراق الثبوتية .. وحقوق اخوي راحت (قالب تلج في برميل موية ساخنة ) .. ورجع صفر اليدين ..

ورجع بي حالة نفســـية خلت البيت كلو عايش سنين من الالم والاحـزان ..

وانا اوضاعي كانت كويسه . وفكرت اقيف مع اخوي الكبير واساعدو يستقر ويتزوج . بس لانو حالتوالنفسية ما مستقرة ومامؤهل لي انو يتزوج . ابوي رفض وقال لي تتزوج انت .. وصالح خليهو للايام. لامن تبرى جروحو ..

المهم انا اتزوجت من البت الكنت بحبها تلات سنة . كانت من جيرانا في دار السلام وبعرفها وبعرف اسرتها كويس .. انسانة ممتازة واهلها ممتازين جدا .. اسمها نادية (تبلدي) . ده لقب ابوها ..

واستاجرت هنا وسكنت انا وزوجتي .. واتعرفنا علي الجيران .. وزوجتي كونت صداقات مع الحريم .. وانا كونت صداقات مع الشباب.

المنطقة دي هنا خليط من كل اطياف الشعب السوداني .. ممكن تلقى زول من اقصى الغرب .. والتاني من اقصى الشرق .. والتالت من الشمال وكدا يعني ..

والبرنامج كان ماشي طبيعي .. انا بجي من الشغل زي الساعة 4 بتغدى وبمرق كدا يا على ميدان الكورة .. يا بنقعد انا واصحابي في ضل العمارة القدام في الزلط دي .. ونتونس جم حياة ست الشاي ونمشي

ومرات بمشي الميدان نتفرج ساي .. انا اصلا مابلعب كورة لكن بحب اتفرج ..

وبجي راجع قريب المغرب .. المهم يازول نادية ماكانت رضيانة وكل يوم تتكلم معاي .. يا شمس انت بتجي من الشغل تعبان .. ودمك فاير .. المفروض ترقد في السريرده .. تاخد لك هجسة وتدي جسمك ده راحة .. وياشمسي وياشمسي .. طواااالي كدا ..

نادية سمراء فاتحة . اوقول قمحية عيونا كحييلة طبعة . فارعة وطويلة جسمها مليان عز الطلب ..

حنينة وبكاية . تبكي في الهينة والقاسية .

تتخيل يوم نحن قاعدين . قعدت تبكي براها .. قلت ليها بتبكي مالك يانادية ؟؟

قالت لي لالا بس اتذكرت حاجة .. ماتشغل بالك مافي حاجة .. هسي اكان كلمتك بتقول لي ياعويرة ..

قلت ليها الحاجة شنويانادية ؟

قالت لي اتذكرت المشهد بتاع استشهاد الطفل الفلسطيني محمد الدرة طبعا"الولد ضربو الاسرائيلين قبل سنتين في سنة 2000 وكان محتمي في ضهر ابوهو .. ماعارف نادية الخلاها تتذكرو شنو؟

وبعدين قعدت تبكي بكا حاااار .. التقول بالله الولد مقتول قدامها هسي .. يعني والله عندها حاجات انا ذاتي بستغرب فيها ..

نادية كانت جد رهيبه ..

وقلبها الصادق ودود ..

شايلة من طبع الملايكة ..

وفيها من عبق الورود ..

فيها اشواق صادقة ديمة .

وفيها وجنات في الخدود .

عندها الاحلام بتضحك ..

وعندها المفقود بعود ..

البعيش يوم عندو نادية.

عاش سعيد عمر الخلود.

.

في يوم من ايامنا السعيدة ..دخلت البيت وانا زهجان وقرفان من الشغل . وكانت عندي مشكلة مع واحد زعطة كدا .. في مكان الشغل ..

جات قعدت جمبي .. وقالت لي حبيبي مالك؟

قلت ليها مافي حاجة يا بت ..

قالت لي لو بتعزني تكلمني .. الحصل عليك شنو؟ انت ماطبيعي ..

قلت ليها عليك الله يانادية تحلي عن افكاري .. انا هسي مافاضي ليك .. وقافلة معاي ..

حسيت بيها انقرصت واتحرجت .. لامن بلعت ريقها .. وعيونها خلاص .. بدن يتملن دموع ..

قامت خشت جوة تاني ما اتكلمت معاي ..

انا حسيت باني احرجتها .. وتضايقت جدا .. دخلت ليها جوة لقيتها مقبلة على القبلة وبتدعي .. انا خفتا قلت يمكن بتدعي علي .. لقيتها بتقول ياربي تخفف عليهو وتحميهو ..

طوالي جيتها من وراها وحضنتها من نصها .. وقلت ليها اسف اسف ياحبي اسف ..

اتلفتت علي .. وابتسمت ودمعتها في عينها .. وضمتني عليها ضمة نسيت كل الدنيا من حولي .. بس برضو حاسس بالضيق .. براحة اتخلصت منها .. وقلت ليها سوي الغدا سريع يانادية .. انا عندي مشوار مهم ..

قالت لي كويس بس بشرط ..

سوقني معاك ياشمسي.

قلت ليها بس ماينفع .. انتي تطلعي معاي .. انا ماشي لي ناس كلهم شباب .. وقعدتنا فيها لعب كشتينة .. وسجاير بيع وشراء .. ونسة رجال .. ماينفع تقعد معانا مرة ..

قالت لي خلاص بقعد في محل الحريم .. انتو موش في بيت عوائل ؟

قلت ليها يا نادية اسمعي الكلام عليك الله ..

قالت ليه خلاص خلاص .. ماتهيج فيني .. خلاص خليتك ..

قلت خلاص بمشي .. بس انتي تاني ماتتلايقي كدا.. قالت لي طيب .

واتغديت طلعت .. وكانت بتتبسم وبتعاين لي .. ووصلت معاي لغاية الباب

وقفلت الباب بي وراي ..

كتير مرات بحس اني انا حقير .. ومابستاهل نادية ..

المهم يا حبايب . طلعت مشيت لي اصحابي .. طلعنا على الكورة لغاية المغرب .. ورجعنا الفرن .

بنقعد في حوش بتاع فرن .. في الحلة قريب للشارع . بنفرش مفرشة .. ونخت سيرمس الشاي .. ونجرها لعب كشتينة من المغرب مرات لغاية الساعة واحدة .. وهي تنتظرني لغاية ماتنعس . وتنوم .

مرات اجي القاها نايمة في الكنبة . ومرات القاها بتكنس في البيت عشان ماتنعس ..

ولمن تتكلم معاي في التاخير .. مابرضى وبهيج فيها كتير .. تاني خلتني بي مزاجي ..

لاني قلت ليها اسمعي يانادية .. ماتنتظريني .. وكت اتأخر نومــي ولاتشتغلي بي ..

بقت تتربس الباب من جوة .. عشان لامن اجي انا .. هي تصــــحى وتخت لي العشـــــــــاء وهي بين نايمة وصاحية ..

وانا ماقادر ادرك تعبها .. ولاشغال بالموضوع ده كتير .. بس اهم حاجة .. اعمل الفي راسي وخلاص ..

اها يوم من الايام اتصلو علي ناس البيت بالليل . في دار السلام قالو لي صالح اخوك عامل مشكلة في البيت .

وكانت بتتكلم معاي الوالدة .. قالت لي صالح اخوك ده الا جنا .. لازم تجي نشوف ليهو مستشفى ولا مصيبة زمان .

قلت ليها كدي يا امي اهدي شوية .وفهميني الحصل شنو الكلام ده يمكن قريب الساعة واحدة بالليل ..

قالت لي سارة اختك مشت مناسبة مع صاحباتها ماريا وسمية بتعرفن ؟ قلت ليها ايوة اها وبعدين؟

قالت لي اول من سارة جات .. مع انو البنات وصلوها .. لاعن خشم الباب .

قام صالح وهاج وضربها فوق خشمها لامن رعفت . وبقى يفتش للسكين قال يضبحها .. هسع والله قافلنها منو في الاوضة . وانا وابوك حارسين الباب . عليك الله ياشمس الدين تعال سريع ..

قلت ليها يا امي هسع اجي بي شنو؟.. لافي مواصلات ولا عربية ..

قالت لي المهم تتصرف ياشمش الدين ..

طبعا نادية صحت من النوم .. وبقت تسأل فيني . الحاصل شنو حبيبي ؟؟

قلت ليها ده صالح اخوي عامل مشكلة في البيت .

قالت لي اها ح تمشي ليهم؟

قلت ليها لازم امشي طبعا" .. قالت لي اها انا اقعد براي هنا؟

بخاف لازم امشي معاك .

قلت ليها انتي اصبري انا بتصرف ..

اها عندي صاحبي اسمو سالم .. ساكن في الشارع الورانا .. عندو موتر . مشيت دقيت ليهو الباب .. قلت ليهو ياسالم انا محتاج ليك في حاجتين شديد وهسي .. اولا عايزك توصلني بيتنا بالموتر .. وتانيا عايز ربيعة اختك .. تجي تقعد مع نادية .. لغاية مانرجع ..

سالم زول واجبات وقلبو حديد .. من منطقة في الشايقية اسمها القرير .. قال لي امشي اجهز .. انا هسع بجيب ربيعة وبجيك ..

رجعت وكلمت نادية .. قالت لي خلاص ربنا يوفقك .. اعمل حسابك حبيبي .. صالح ده وكت يكون هايج مابشوف قدامو .. بضرب بي اي حاجة قدامو ..

قلت ليها ماتشيلي هم انا بتصرف ..

وجاء سالم وجاب ربيعه معاهو دخلناهن جوة وقفلنا عليهن الباب من برة . ومشينا ..

وتعال شوف الراجينا في البيت ..

لاحول ولاقوة الا بالله ..

الى اللقاء ..

comments

أضف تعليق


Sudanese Songs | اغانى سودانية

كراكاتير سودانى

توثيقات سودانية | تابعونا على اليوتيوب

 
Merken
Merken
Merken
Merken
Merken

مدن ومعالم سودانية

Who's Online

44 زائر، ولايوجد أعضاء داخل الموقع

منوعات ثقافية

الشعر السودانى

اغانى وطنية

الصحة والتعليم

توثيقات سودانية

معلومات علمية

تاريخ السودان

متنوعات ثقافية