يوميات علوب ... 65...... ورا ( البسمات ) كتمتا ( ضلوع )

تقييم المستخدم: 5 / 5

تفعيل النجومتفعيل النجومتفعيل النجومتفعيل النجومتفعيل النجوم
 
 

يوميات علوب ...65......ورا ( البسمات ) كتمتا ( ضلوع ) ..!!!

مشينا لينا رحلة في العيد الفات ده ...!!! شلتنا زمان ايام الجامعة ..!!! ولينا زمن ما اتلاقينا (فيس تو فيس ) بس ياهو (الفيس ) نتقالد باللايكات ....!!! المهم كانت لمه لذيذه ...ودكريات حلوه ...ولقينا ليك واحدات عرسن وجن خامات عيالن..!! 

..!!! قلنا خير وبركه ..!! لكن جزء كبير من الشباب لِسَّه طاير ....!!! اها جات من الضمن واحده كانت زميلتنا وفردتنا شديد اسمها (بسمات ) زوله لذيذه شديد ودي الوحيده الشباب زمن (الجاهليه ) والجامعه فشلو في تصنيفا سمحه ولا شينه ...!!! لانو روحا ذاتا مابتديك فرصة تصنف ....!!! حاجه كده عجيبه ....!!! بعدين عفويه جدا ... واصلو مابتتلفت ...!!! وماعندها حركات البنات ديك ..!! ( أنا لا اكذب ولكني أتجمل) بتقش اي حاجه ...!!! البت الوحيده الكانت بتمشي معانا (البوش ) والفتت تاكل لما (تتشرق ) وتبقي ماشه ...!! ولو مادفعت حق ( الشيرنق ) مابتاكل ....!!! نحنا كنّا سامنها (عباس ) اي والله عديييل كده ...!!! واصلو مابتعترض ..نلاقيها عااادي ....وين يا ( عبس ) والله بترد كأنو اسما ....!! اها (بسمات ) جات الرحلة ...!!! والله لما اتكيفنا ....!! كمان جات بي خطيبا ...!! نحن قلنا الليلك الا نشوف خطيب ( بسمات ) دي ..!! أكيد ده زول ( شفت ) الاكتشفا ده ....!! طلع ولد لطيف كده ومهذب النوع المسكين داك ..!!!

قلنا ليها ده جبتي من وين يابسمات ..!!! وغشيتي كيف ...!!؟ قالت والله هو الغشاني ....!!! ماتشوفو مسكين كده يحنن ..!!! قلنا ليها والله لو ما مسكين مابقع فيك ...!! أوعي بس تكوني غاشاهو وعاملا ليهو البت رقيقة وحساسة ....!!! اخدت ليها ضحكه من ضحكاتا الزمان ديك ...!! أي زول أتلفت ...!!! قالت الله يجازيكم انتو لي هسه في جنكم ده ....!! قلنا ليها والله لو ماقلتي لينا بنكلمو ...!!! وكانت المفاجآه انها طوالي نادتو ...!!! طلع اسمو ( معاذ ) انتو قايلين قالت لي شنو ....!!! تعال يا (معاذ ياابو عيونن لذاذ) ....!!! تعال نعرفك علي أصحابي ديل ...!!! نحن صبت فينا مطرا ....وزولك (ابو الما ) اصلو

ماكضب طوالي جا ...!!! قالت ليهو من قبيل (بزرزرو ) فيني قالو لي لقطتي الود (المز ) ده من وين ...!!! (هو ذاتو زول جنتل كده وقيافه ..) ..حتي ناس (وفا) قبيل قطعوا فيهم انا سامعن ...!!!! قالت صحي (الشينات ) حظهن عالي ..!!شوفي (بسمات) الجابتو ...!!! ( دورن الحاقدات ) ....!! اها (معاذ ) طوالي رجع ليها (الباص ) قال ليها وليه ماكلمتيهم ...!!!؟. قالت لي دايرا أكلمم قدامك عشان يصدقوني ...!!!! وأتلفتت علينا ....اها عاد النكلمكم ( معاذ ) ده صيدلي ...!! اصلي يوم واحد في حياتي ماشفتو ..!!!وجني وجن الصيدليات ...!!! مشيت اليوم داك الصيدلية اشتري لي دوا لي ود اختي الصغير..!! حرارتو مرتفعه ....!! اها قام هو سألني عمرو كم ...!! ومن متين الحرارة ..!!؟ والحنك ده ....!!! المهم شرحتا ليهو قام اداني الدوا ...!!! وشرح لي طريقة الاستعمال..!!! قال لي انت (أمو ) مش كده ....!!!؟قلتا ليهو هسي امانتن في ذمتك دي خلقه يعرسوها وتجيب ولد ...!!! عليك الله ادينا الدوا ماتقلب علينا المواجع ....!! والله معاذ القدامك ده ضحك لما عايز يقع ،...!!! قال لي ياخ بالغتي في زول بقول عن نفسو كده ...!!؟ قلتا ليهو ايوه انا دي ...!! عجبك ....!! والنزيدك من الشعر بيت ..!! أصحابي في الجامعه كانو بقولو لي (عباس ) ....صاح ياشباب ..!!؟ نحن بس نعاين ماقادرين نتكلم قدام ...(ابو الزوز) .....حالتي غمزتا ليها ماتحرجنا مع الراجل .....!!! طوالي قالت ليهو اها علوب غمز لي ما أكلمك .....!!! ومعاذ حسينا بيهو داير يطير من الفرح ...( له الحق وهي بكل هذه التلقائية والحضور ) قال ليها تمي ليهم القصة ...!! قالت اها قلتا ليهو ادينا الدوا ياخ جعانين

النمشي نحصل لينا عضه قبل ماتمغرب ...!!! والله ياحبايبي وماطالبني حليفه...!!! معاذ ده بس فاتح خشمو يعاين لي ...!!! وانا وحاتكم ولا شغاله بي الشغلا ..!!! قال لي ياخ انت ألذا زول اشوفو قريب ده ...!!! قلنا ليهو ولا أظن حتشوف ...!! ادينا الدوا خلينا النتخارج ....!!! قال لي بديك الدوا ...بس حلفتك بي الله تجي تاني ...!! قلتا لي عليك الله الحنك بتاع الدكاتره ده انا مابقسم معاي .....!!! انتا قايلني انا قريت صيدله ..!! كان دايرني هداااك بيت أبوي ...!! طبعا انا قلتها ساكت بي حركاتي الإنتو عارفناها ديك ..!!! تنقرو ماجا ...والله جا ذي الماحصلت حاجه .....!!! أسبوع كده (معاذ ) اتصل بي ...!! النصيحه انا اديتو التلفون وقسما بالله مالي اي حاجه بس عشان لو في حاجه في الدوا اختي تسألو ...!! معتصم صاحبنا قال ليها (اختتتتك ) برضو ...ونحن ضحكنا ...!! خبتت ليك معتصم بالشنطه في نص ضهرو ...!! وواصلت عادي ....!! اها ضرب لي قال لي انا معاذ ....!! والله نسيتو..!! قلتا ليهو معاذ منو ..!!؟؟ قال لي معاذ ياخ الصيدلي بتاع دوا ود أختك   نسي الصيدلة القراها كلها بقي تخصصوا دوا ود اختي ....!!! ماعلينا قلتا ليهو ايوااا .....!! اهلًا خير..!! قال لي انت مش قلتي لي هداااك بيت أبوي ..!! اها انا جاي أخطبك ...قربتا أقول لي النمرة غلط ...!! لانو دي المره الوحيده في حياتي الشعرتا فيها انو انا بت وبتتخطب وكده ..!! المهم باختصار اخدنا قعده كده وفعلا جا خطبني وعقدنا الشهر الجاي ..!! اها ان شاء الله بس اتفشيتو وعرفتو ...!!! ومعاذ يضحك ساااكت ...ويتابع بي إعجاب والله نحن قربنا نبشر ... ياها المحريه فيك يابسمه ..!!! ذات اللطف والعذوبة والصدق والبهاء ....وليك حق تتكسر ياعزوز ...!! نوع (عباس ) دي بتخلي ايامك باسطة....

اها بعد شويه قامو ضبحو خروف الرحلة ولما جات سيرة (الكمونيه ) وحيعملوها كيف ....الجكس ده كلو قعد يضاير   ...كل واحده دخلت في شخصية (جنيفر لوبيز ) وواحدات نكرنها حطب ...!! والله الساعة ( بسمات ) وقفت كده علي حيلا ووقالت بسسس (الكمونيه ) دي قلتها وانا ستها ....!! نحنا طوالي صفقنا....!!! وقالت كده قعدت فيها ذي (الغسال ...!! ومعاذ ..حلاتو قعد جنبها يمسك ليها وهي تقطع ...لوحه بس .....!!!

أقعدن انتن اتضايرن وخشن في الشخصية ...!!لا تلمن في الكمونيه ..!! ولا عِش الزوجية ..

مبسوط منكم ياعزوز وبسمه ....بيت مال (وكوارع)   ...وتغنيلو بت (عباس ) ياعينيا انا ...(وزوزو) اخد الكاس ياعينيا انا ...(عبس ) يا ...

comments

أضف تعليق


Sudanese Songs | اغانى سودانية

كراكاتير سودانى

توثيقات سودانية | تابعونا على اليوتيوب

 
Merken
Merken
Merken
Merken
Merken

مدن ومعالم سودانية

Who's Online

45 زائر، ولايوجد أعضاء داخل الموقع

منوعات ثقافية

الشعر السودانى

اغانى وطنية

الصحة والتعليم

توثيقات سودانية

معلومات علمية

تاريخ السودان

متنوعات ثقافية