يوميات علوب ...86.. .ساره الضاره

تقييم المستخدم: 5 / 5

تفعيل النجومتفعيل النجومتفعيل النجومتفعيل النجومتفعيل النجوم
 

يوميات علوب ...86.. .ساره الضاره

غايتو السودان ده بس يمحن ...!! مشينا لينا عرس امبارح غايتو انا بوبار ذي ده قريب ده ماشفتو ....

اول حاجه العريس والعروس كان ليهم مراد يجو خاشين بالجو ..!! اصلو الواطة دي ما معانا... !! قلنا كويس فرحة وعرسه واصلها مره واحده ( للعروس طبعا ) الرجال ديل ما مضمونين ...!!

اها العروس عرفناها البنات المعاها ديل مالن ...!!؟ يازووول البوز ده ممدود شبرين ...شكل حركة يعني ...(وزيره وافتخر) قلنا خير وصلاتا علي النبي ....!!

لكن النصيحه في بنات شديدات ...!! غايتو في واحده كده جهجهت باكات الحفله دي كلها ..ما بتعرفا سمحه شديييد ولا براحه ...!!سمينه ولا ضعيفه ...!! صفرا ولا سمرا ...صاحيه ولانايمه ..!! النوع داك الببرجل ..!! مش في نوع كده بزغللك ..!!!بس ياهو ده ...غايتو لما قالت كده وابتسمت الحفله دي كلها تتبسم ....!! بعدين هي النوع داك العارف نفسو سمح لكن ماشغال بيها كتير...!! وعارفا الناس دي مركزا لكن عامله رايحه ....!!!اها داخله ومارقه ذي حصان السبق ...!! مرات كده الشعر ده بنزل علي العيون كده يغتيها ..!!! (من عيون الناس دي ...) والله وكت تدي نفضه كده وتهشو من عيونا ..نحن بهناك نتلولح ساااكت ...!!! والنَّاس دي تتاوق ...

طبعا الجماعة يعجبوك طوالي نزلو سيرتا الذاتية ..!! قالو اسمها ساره ...(اصلو بت اسمها ساره دي مابتجلي ...) وبتقرا طب في مأمون حميده ...!! و بيتم في الرياض ...اخطر مثلث أمني ...(ساره طب حميدة ..!! والرياض( ....!!

هل بتصدقو ان (ساره ) دي البكت الناس دي ...طلبتني انا علوب ده بالاسم ...اي والله قالت لي (معزه ) ..!! (معزه ) دي كانت زميلتنا في الجامعة وهي العازمانا العرس ده ...) ...قالت ليها انا داير اشوف علوب ده ..!!! وعندي ليهو كلام بعد الحفلة ...!!!

هو انا تاني فهمتا حاجه ...!!!بقيت داير الساعة حداشر دي متيييين تجي ..!! اكتر من الفنان ...!! وخلاص حيلي برد ...!! ويديني بقو صاقتاات ...!! لكن بأمانه وبيني وبينكم انا ذاتي الليله لاحظتا اني رهيب شديد ...!! القميص حق امريكا ده الظاهر عامل شغل ....!!! والله فعلا السفر ده مرات مهم ....!!! يازول ماصدقتا الحفله انتهت ...بقيت اجرجر في رجليني جرجير ...راجي (معزه ) تجيب( ساره ) دي اشوف قصتا ...!! لا لا لا غايتو ياعلوب طالما مابقيت تلفت نظر البنات قدر ده ...انت عبرتا ...!!!

بس يازول جاتني (معزه ) من هناك قالت لي دقايق بس ياعلوب ماتمشي ساره دي قالت تنتظرا دايراك ثواني ...!! بي قلبي قلتا ليها ليه (ثواني ) ..!!! ان شاءالله باقي العمر كلو ...!!

وقالت كده الكتاحه جات ...!!! تقدل من بعيد ذي ( المرسيدس(

معزة قالت لي أعرفك ..اختي وصاحبتي شديد ..ساره ...!!

ساره أنور ..!! ( شوف اسم الابو ذاتو كيف ....!!! يلمع ) ...!! واهو ده (علوب) شخصيا ياساره ...( هكذا قدمتني ( معزه(

انا هنا خلاص بقيت اتمتم ....!! (شخصيا دي يعني في تفاصيل وقصة قبل الشوفه دي ...!! اخدتا لي سرحه كده ...!! قطعتا (معزه ) قالت ليها خشي في الموضوع طوالي ياساره علوب ده فردتنا شديد وأخونا والحاله واحده ....!! اها (سروره ) اخدت ليها ضحكه كده النوع البغمر داك ..!! قالت لي والله بس انا محرجه شويه ....!! الحقيقة بس انا شفتك في الفيس منزل صوركم في الملتقي بتاع الرفق بالحيوان الكان في امريكا ده ...وبالجد انا فخورة انو يكون في سوداني ضمن الناشطين في رعاية الحيوانات ..!! ودوليا كمان ...(انا هنا بطني بدت تطم وحبة وجع كده ...!! ) وهي واصلت ...الحاصل انا ياعلوب زيك كده بس نشاطي كلو حاصراهو في ( بمبوني ) ...!! وداير اشوف بي خبراتك كيف نقدر نعمل جمعيه هنا في السودان ترعي الحته دي ...!! قلتا ليها( بمبوني ) ده منو ..!!! قالت لي ....(اتز ماي دوق ...) كده بالإنجليزي ...(طلع كلبا(....!!!?

والله ياخوانا كان لي مراد اديها كف ...!! هسه انا قاعد منتظر اشوف السيد ( بمبوني ) ...حينضما لي ياتو شله من الكلاب

..!! قلتا ليها ...لا بسيطه ان شاءالله ...نحنا شغالين علي الحته وحافيدك اول بي اول ....!!! صدقو قالت لي فرحتني شديد ...وده رقم موبايلي ....عليك الله وريني اول بي اول ...!!! جد انا سعيده ...!! (انا قلتا سعيده بي معرفتي ...) اخدتا لي بسمه ...!!! قالت سعيده انو (بمبوني ) اخيراً ممكن يلقي رفقة ميمونة ..

هسه انا اضحك ولا ابكي ياجماعه   ...!!! قلتا ليها جدا ...!!! تصبحي علي خير ...!! وان شاءالله بمبوني يصبح مافي بركة الليل ده ...!!! وانا حاتصل ..!! وحتي لو كنت مشغوله ماتتعبي نفسك اديني (بمبوني ) ..اوريه وصلنا وين ...!! وانا حلفتا لو ماجبتا ( بمبوني ) لي كلب ناس حاج التوم (اتعشي ) بيهو تضحكي علي ياساره ..بالله شوف البت دي عليك الله ...!! بمبوووني ...!!!

comments

أضف تعليق


Sudanese Songs | اغانى سودانية

كراكاتير سودانى

توثيقات سودانية | تابعونا على اليوتيوب

 
Merken
Merken
Merken
Merken
Merken

مدن ومعالم سودانية

Who's Online

47 زائر، ولايوجد أعضاء داخل الموقع

منوعات ثقافية

الشعر السودانى

اغانى وطنية

الصحة والتعليم

توثيقات سودانية

معلومات علمية

تاريخ السودان

متنوعات ثقافية